Киң җәмәгатьчелек Илфак Шиһапов белән хушлашты (фото)

Соңгы юлга озатырга килүчеләр арасында Илфак Шиһаповның озак еллар бергә яшәгән хатыны Илсөя Бәдретдинова, журналистлар, язучылар, сәнгать әһелләре, җырчылар белән беррәттән, гади халык та күп иде.

"Илфакның милли җанлы, олпат шәхес икәнен еллар узган саен гына тирәнрәк аңларбыз, - диде "Шәһри Казан" газетасы редакторы Гөлнара Сабирова. - Ул нинди генә жанрда иҗат итсә дә, йә елата, йә көлдерә иде, берәүне дә битараф калдырмады. Илфакның иң зур сәләте - кешене битараф калдырмауда. Илфак яшәргә ашкынды, шушы ашкынуы аны талкыткандыр да. Ялгышлары да бар иде. Ул үзенең хаталарын таныды, аңлады. 18 май көнне соңгы очрашуыбызда озак итеп сөйләшеп утырдык. Шунда да ул ялгышларын төзәтергә омтылыуын әйтте. Ходай аның бу хаталарын үзе кичерсен".

Илфак Шиһапов туган ягында - Лениногорск районының Иске Иштирәк авылында җирләнәчәк.

Исегезгә төшерәбез, Иштирәктә Илфакның 78 яшьлек әнисе - Асия апа яши.