Усали мәктәбе укучылары Ришат һәм Валерий — махсус хәрби операция батырлары

«Күктән минем белән хушлашкан»

Мәктәпкә килеп керүгә, минем класс укучысы Ришат Җиһангәрәевкә куелган хәтер тактасы каршы ала. Ул күршедәге Югары Кыерлыдан йөреп Усали мәктәбендә белем алды, Мамадыш политехник колледжын тәмамлады. 2014 елны армиягә алынып, соңрак хәрби хезмәтен контракт нигезендә дәвам итә. Мотоукчылар батальонында БМПы төзәүчесе була. 2022 елның 24 сентябрендә һәлак булган дигән хәбәре килә. Әнисе Зоя (кыз фамилиясе — Григорьева, Түбән Әрнәш кызы) сүзләренә караганда, Ришат аның терәге, таянычы булган. Башта Таҗикстанда хезмәт иткән. 2022 елның февралендә контракт хезмәтенә 6 ел туласы булган.

«Соңгы тапкыр 2022 елның 10 сентябрендә сөйләштек, ләкин махсус операция зонасында икәнен әйтмәде, борчылыр, дигәндер. 24 сентябрь төнендә төшемә керде. «Әни-и-и!» — дип әллә кайдан кычкырды да, күптән күрешмәгән төсле, кысып-кысып кочаклады. Нәкъ шул вакытта күктән минем белән хушлашкан, күрәсең», — дип, күз яшьләренә буыла-буыла сөйләде мәктәпкә очрашуга килгән Зоя Петровна. 

Ришат бәрелеш барышында иптәшләре белән засадага эләгә, яраланып, батырларча һәлак була. Бер ел буе хәбәрсез югалганнар исемлегендә йөри. Генетик анализ ясатканнан соң, туган авылы зиратында җирләнә. 

«Ришат Җиһангәрәев соңгы сулышына кадәр хәрби антына тугры булып калды. Шундый батыр ул үстергәнегез өчен рәхмәт Сезгә! Ул ватандашларына чын батырлык, тугрылык үрнәге күрсәтте», — дип сөйләде соңгы юлга озатырга җыелган халык алдында район хәрби комиссары Андрей Синкевич. 

Контракт төзеп китә

Валерий Тупаевны да рус теленнән укыттым. Елмаеп торган тыйнак малай чагы бүгенгедәй күз алдымда. Владимир мәктәбеннән соң, Усалида укый. 1996 елда мәктәпне тәмамлагач та Армия сафларына алына. Түбән Новгород өлкәсенең Саров (элекке Арзамас) шәһәрендә 2 ел хәрби хезмәттә була. Умартачы һөнәрен үзләштерсә дә, Казан, Яшел Үзән кебек эре промышленность шәһәрләрендәге производство үзәкләрендә эшли. Махсус хәрби операция зонасында барган бәрелешләргә битараф кала алмый Валерий. 2024 елның мартында контракт төзеп китә. Валерий Тупаевның гәүдәсе туган авыл зиратына алып кайтып җирләнә.

«Ходайдан сабырлык сорыйм. Нишлисең, бер безгә генә килгән хәсрәт түгел, ил буйлап бик күп алар. Бүтән кешегә мондый хәсрәт күрергә язмасын », — дип үзен юата әнисе, биш баласының икесен югалткан Анный түти.