Керәшен җыруы

Әкрен генә берәр җыру көйләп,

Җырлап утырыек шул көйгә.

Кадерләре булсын малларыңның,

Ямьнәр кереп китсен бу өйгә.

Сузылганчы сузыйк без җыруны,

Безнең гомер озын бит әле.

Покыраулар да җитә башлаганда,

Безнең якларга да кил әле.

Җыртык җире булса җыруларның,

Җамый-җамый җырлап үтәрбез.

Юллар төшсә, сезнең якка таба,

Хәлегезне белеп китәрбез.

Олы көннәр җитәр, Алла боерса,

Күкәйләрне манып куярбыз.

Туган-тумачалар, килегез безгә,

Күңелебез иркен, сыярбыз.