Тальян моңы

Тальян моңы

Павел Апушев

Җәй көннәре ачсам тәрәзәмне,

Гашыйк булып айлы төннәргә,

Су буеннан искән җилләр белән

Тальян моңы керә өйләргә.

Тукта, бу көй безнең өебездә

Тәүге тапкыр кайчан чыңлады?

Яу кырына әткәй киткән көнне

Күрше Ләкси дәдәй уйнады.

Әткәй китте шуннан, без калдык,

Безнең белән калды моң гына.

Шушы көннән тальян тавышын мин

Тыңлый алмыйм, никтер, тын гына.

Һаман көтәм, киткән юлы буйлап

Кире кайтыр төсле тоела.

Җавап  булып ләкин уйларыма,

Һәр көз сары яфрак коела.

Җәй көннәре ачсам тәрәзәмне,

Гашыйк булып нурлы төннәргә,

Тальян моңы керә өйләргә.

Кушылып җырлый төсле әткәй дә

Яшьләр сузган дәртле көйләргә.

Г.Макаров фотосы