Подписчиклар арасында уйнатылачак бер бүләк - чәйник

Бу уңайдан, газетабызны укучы кадерле карендәшләр, спонсор эзләвебезне хәбәр итеп, “Туганайлар”ның призлар фондын тулыландыруда сез дә, бәлки, ярдәм итәрсез дип язып та чыктык.

Һәм менә, иң беренче булып, призлар фондына дигән бүләкне – “Novex KN-1811” маркалы электр чәйнеген Түбән Кама шәһәреннән китерделәр. Аны безгә гомеренең 50 елга якынын журналистикага багышлаган, озак еллар дәвамында район газетасы редакторы булган, бүгенге көндә “Шинник” спорт комплексында матбугат үзәге җитәкчесе булып эшләүче карендәшебез Виктор Шадрин җибәрде.

Шулай итеп, Виктор Борисовичның җиңел кулы белән, призлар фондын туплауга керештек. Матур башлангыч бар инде, карендәшләр, Призлар фондына төрле кибетләргә сертификаттан башлап, телевизор, пылесос, чәйнек, үтүк кебек көндәлек тормышта кирәк әйберләрнең барысы да ярый. Розыгрыш өчен редакциягә тапшырган бүләгегез белән сезне фотога төшереп, спонсор икәнегезне күрсәтеп, сайтыбызда фотогызны да чыгарырбыз.
Башка бүләкләр белән алга таба таныштырачакбыз! Яңалыкларны күзәтеп барыгыз.