"Кряшен чибяре" – 2010: Алина Федотова (Константинова)

- 2010 нчы елда “Кряшен чибяре” җиңүчесе булган идем. Конкурс миңа бик күп нәрсә бирде. Бу турыда бик күп китаплар актарырга, өйрәнергә туры килде, чөнки конкурс шартлары буенча сорауларга җавап бирәсе бар иде. Ул елны миннән дә “популяр” кеше булмагандыр. Мамадыш районы безнеке дип горурланса, Алабуга газеталары да безнеке дип язды. Чөнки Алабуга мәдәният һәм сәнгать көллиятендә, берьюлы КФУның Алабуга институтында укый идем. КФУның үз газетасы да “Безнең студент – җиңүче!” дип язды.

Питрәч районы Янсуар авылына килен булып төштем. Ирем Дмитрий Фетодов белән ике малай – Данил һәм Денисны үстерәбез.

“Кряшен чибяре” конкурсында өйрәнгәннәремне эштә дә файдаланам. Олы көн, Май чабу, Трочын бәйрәмнәре үткәрәм. Балалар белеп үссен. Татар, рус халкы кебек арабызда керәшен халкы да яши. Аларның да үз тарихы, традицияләре, культурасы бар. Үзем җырлыйм, биим, белгәннәремне балаларга да өйрәтергә тырышам.