Яңа ел кичендә

Яңа ел карлары ява

Тын гына, салмак кына.

Табигать нидер пышылдый,

Тик булмый аңлап кына.

Бу карлар, бәлки, явадыр

Дөньяны пакълар өчен

Үткәннең соры көннәрен

Ак белән каплар өчен.

Атлыйм шәһәр урамыннан,

Уйларымның юк чиге.

Яңа елда бәхет яусын

Шушы карлар шикелле.

Без муллыкка күнекмәгән,

Без азга да канәгать.

Бәхетле без атар таңны

Күрсәк тә сау-сәламәт.

Бар халык Яңа ел көтә,

Җемелди тәрәзәләр.

Яңа ел белән, дусларым!

Яңа ел белән, шәһәр!

Никифор Тукмачев