Татарстанда 990,1 мең квадрат метр торак сафка бастырылган

2017 елның 8 июненә булган мәгълүматлар буенча республикада 990,1 мең квадрат метр торак сафка бастырылган. Бу - пландагы эшнең 41,2 проценты, ягъни узган елдагыча. Бу хакта бүген Татарстан Хөкүмәте йортында республикакүләм киңәшмәдә төзелеш, архитектура һәм торак-коммуналь хуҗалык министрының беренче урынбасары Алексей Фролов белдерде, дип хәбәр итә Татарстан Президентының матбугат хезмәте.

Киңәшмәне бөтен муниципаль районнар белән бергә видеоконференция элемтә режимында Татарстан Президенты Рөстәм Миңнеханов үткәрде. Киңәшмәдә Татарстан Премьер-министры Алексей Песошин да катнашты.

Социаль ипотека программасы нигезендә статистика органнарына мәйданы 175,5 мең квадрат метр тәшкил иткән 67 йорт (3 мең 249 фатир) буенча хисап тоттылар. Бу программа буенча төзелә торган 144 йортның 61е югары дәрәҗәдә әзер, 28е - уртача әзерлектә, 55ендә әзерлек түбән дәрәҗәдә.

Татар-информ