Керәшен әбиләре япкан «дарай яулык» нинди булган?

Керәшеннәр затлы һәм кыйммәтле ефәкне "дарай" дигәннәр. Шуннан чыгып, куе кызыл төстәге ефәк, чуклы яулыкларны дарай яулык дип атаганнар.

– Музеебызда бик тә затлы ефәк яулык саклана. Мондый ефәк яулыкларны безнең әбиләр ,"дарай яулык", дип йөрткәннәр. Үзеннән чыккан матур бизәкләренә өстәп, әле дүрт почмагына матур итеп чигеп тә куйганнар. Бизәкләрне сугып ясаган вариантлар да бар, –  дип сөйләде Валентина Максимова. 

Мондый яулыкларны бик кадерләп тотканнар, шуңа да карамастан, урта өлеше "сынган", әмма ертылмаган. Әлеге затлы "дарай яулык"ны бәйрәмнәргә, туйларга гына бөкләп бәйләмичә, ябынып кына йөргәннәр.

Кайчандыр Колышчы авылы сылуы Марҗүкның иңендә йөргән әлеге яулык бүген авыл музеенда саклана, - ди Валентина Максимова.