Зәйдә “Сугыш хатын-кыз өчен түгел” акциясе бара

Безнең һәрберебез бүген дә Бөек Ватан сугышы ветераннарына, тыл хезмәтчәннәренә аларның көндәлек тормышларында ярдәм итә ала. Иске Зәй яшьләр үзәге "Сугыш хатын-кыз өчен түгел" проектында катнаша. Биредә эшләүчеләр даими рәвештә тыл хезмәтчәннәренең өйләренә барып, төрле эшләрдә ярдәм итә. Ә иң мөһиме - ярдәм түгел, игътибар.
Тыл хезмәтчәне Вера Зайцева яшәгән йортта аларның беренче генә булуы түгел. Узган елның языннан башлап аңа ярдәм итеп торалар, пандемия чорында азык-төлек һәм дарулар белән тәэмин итүдә булыштылар, кышын ишегалдын кардан чистартып тордылар, яз җитүгә чүп-чардан арындыруду эшләрен башкарганнар.
Вера Ивановна - бик актив кеше, сәламәт яшәү рәвеше алып бара.Шулай да быел кыш авырган, кулын авырттырган.
- Кул кушырып утырмыйм, яшелчә, чәчәк үсентеләре үстерәм, - ди ул.
Бөек Ватан сугышы башланганда Вера Ивановнага нибары 10 яшь була. Ул авыр сугыш чорын яхшы хәтерли.
-Ашны төрле үләннәрдән пешердек, орлыклар җыя идек, алардан он ясадык. Аеруча кышын авыр булды. Җәен урманда барып җиләк, гөмбәләр җыеп була иде әле, - дип искә ала ул.

Сугыш еллары ерагая бара. Аның михнәтләрен күргән ветераннар, тыл хезмәтчәннәре дә сирәгәя. Шуңа күрә исәннәренә игътибар күрсәтеп, Бөек Җиңү өчен рәхмәт сүзләрен әйтеп калыйк.

Зәй офыклары