Җырчы Җәкәүнең 175 еллыгы уңаеннан иҗат кичәсе оештырыла

Бу конкурс-фестиваль күренекле агартучы, беренче керәшен шагыйре Я.Е. Емельяновның тууына 175 ел тулу уңаеннан, Татарстан мәдәният министрлыгының Я. Емельянов исемендәге мәдәни үзәге һәм республика керәшен иҗтимагый оешмасы тарафыннан оештырылды.

Республикабыздагы милли мәдәниятләр һәм традицияләр елында үткәрелгән «Җәшнә кояш, җалтыра» конкурсының финалистлары инде билгеле. Ә җиңүчеләрне бәйрәмнең тантаналы өлешендә беләчәкбез, һәм аларга бүләкләр тапшырылачак. Концертта әлеге конкурс-фестивальдә җиңүчеләр һәм керәшен фольклор коллективлары, керәшеннәрнең «Бәрмәнчек» дәүләт фольклор ансамбле, аерым җырчылар чыгыш ясаячак. Бәйрәмдә Татарстан Рәисе грантын откан акчага тегелгән этник костюмнар да күрсәтеләчәк.

Керәшен поэзиясе үрнәкләре булган мирас — 20ләп шигырь язып калдырган Я. Емельянов, иске стиль белән, 13 мартта шушы районның Алан Полян авылында туган. Шуңа да, бу иҗати кичәсен Балык Бистәсендә оештыру очраклы түгел.

Аның әдәби мирасын өйрәнүчеләр арасыннан күренекле әдәбият галимнәре Мөхәммәт Гайнуллин, Хатип Усманов, язучы Михаил Глухов, шагыйрь Равил Фәйзуллин керәшен шагыйре Яков Емельянов иҗатына югары бәя биргәннәр. Тарихка беренче керәшен шагыйре буларак кереп калган җырчы Җәкәүнең шигъри юлын Давид Григорьев (Саврушевский), Дмитрий Касимов, Василий Багряшевский, Егор Уткин, Григорий Родионов (псевдонимы Гәрәй Рәхим), Ананий Малов (Ямаш Игәнәй) һәм башкалар дәвам итә.

 II «Җәшнә кояш, җалтыра» конкурс-фестиваленең программасы:

14:00 — 14:15 — конкурс-фестивальнең ачылу тантанасы.
14:15 — 14:30 — сәламләү.
14:30 — 14:50 — җиңүчеләрне бүләкләү.
14:50 — 15:00 — этник костюмнар презентациясе. 
15:00 — 16:00 — җиңүчеләрнең чыгышлары.
16:00 — конкурс-фестивальнең тәмамлануы.