Хезмәттәшебез Фирдания Сабирова бакчасында гигант баклажан үстергән

Яшелчәнең авырлыгы 1,4 килограммнан артып киткән. Бу хакта ул безгә үзе сөйләде:

 «Бакчабызда ел да кыяр, помидор, кишер, кабачки, баклажан үстерү белән шөгыльләнәм. Тик мондый зурлыктагы баклажанны күргәнем юк иде.  Аның нинди сорт икәнен төгәл әйтә алмыйм, үсентесен сатып алдым да утырттым, язып та калмаганмын.  Баклажаннан кышын ашарга дип күп итеп салат  ясыйм. 5 литр әзер салат өчен, 1,5 килограмм баклажан кирәк. Ә минем баклажанның уңышы бик әйбәт булды", - диде ул елмаеп.

Салат өчен кирәк: 3 кг помидор, 1,5 кг баклажан, 1 кг татлы борыч, 0,5 стакан 9 проценты уксус, 1 стакан шикәр комы, 2 аш кашыгы тоз, 1 кечкенә ачы борыч (яки 0,5 чәй калагы төелгән кызыл борыч), 0,5 стакан көнбагыш мае, 2 баш сарымсак.

Иң элек, баклажанның ачысын чыгару өчен, эре шакмаклап турап, өстенә тоз сибеп, ярты сәгатькә читкә алып куябыз, аннары, суын сыгып, юасы гына кала.

Помидорны иттарткычтан үткәрәбез, кастрюльгә салып, кайнатып чыгарабыз. Аңа тоз, шикәр комы, көнбагыш мае, вак итеп туралган яки угыч аша үткәрелгән сарымсак, ярым боҗралап туралган татлы борыч, вак итеп туралган ачы борыч, баклажан салып, тагын бер кат кайнатып чыгарабыз һәм акрын утта 20 минут пешерәбез. Пешеп чыгарга 5 минут кала уксус өстибез. Стерильләштерелгән коры банкаларга салып, капкачлап, әйләндереп куябыз. 5 литр әзер салат чыга.