Халкың өчен җырлап яшә, Георгий

Аны чын күңелдән бәйрәме белән котлыйбыз. Исәнлек-саулык, бәхетле тормыш, иҗат уңышлары телибез.

Георгий Ибушевка

Бирсә Ходай, бирә икән сәләт — 
«Түләмичә аңа һәм бушка».
Туган якның барча былбыллары 
Тавышы бардыр җырчы Ибушта!

Әйтерсең лә, йөрәгендә аның
Йөзәрләгән учак кабынган. 
Шуңадырмы, җыр һәм шигырьләре
Кайнар хисле моңга манылган.

Көмеш кыңгыраулар чыңлыймыни,
Чишмә агамыни таулардан?
Халкым тыңлый Ибушевның җырын,
Ләззәт алып сихри моңнардан.

«Рәхмәт сиңа, җыр!» китабың үзе —
Халкым өчен бик зур бүләк ул.
Туган халкың өчен җырлап яшә, — 
Бездән сиңа изге теләк шул.

Якташыбыз Рәим Гобәев үзенең бу шигырен 2007 елда Георгий Ибушевка багышлап язган («Үткәннәр сагындыра», шигырьләр, Казан «Ихлас» нәшрияты, 2014 ел, 124нче бит). Ул — районыбызда гына түгел, республикабызда билгеле шәхес, берничә китап авторы. Гомере буе Мамадыш районының Көек-Ерыкса урта мәктәбендә туган тел дәресләре укытты. 

Якташыбыз, әле шушы сентябрь аенда гына 80 яшен тутырган җирле шагыйребез Рәим Гобәйнең районыбыздагы күренекле шәхесләргә багышланган «Багышлаулар» циклы да бар. Алар арасында, әлбәттә, асыл карендәшебез Георгий Ибушев лаеклы урын алган...

Лидия Пасыева. 
Мамадыш районының Усали авылы.