Түбән Үрәс авыл җирлеге башлыгы көрәш буенча икенче урынны яулаган

 Милли көрәш — авыл җирлекләре арасында бара торган спартакиадага керүче спортның бер төре.

“Спорт ул үзе бер тормыш. Аннан башка яшәешне күз алдына китерү кыен. Һәркем үзенең сәламәтлегеннән чыгып, я спортчы була, я сәламәт яшәү рәвешен сайлый. Ә бүген монда килүчеләр — иң кыю спортны сайлаучылар”, – дип язды район башлыгы Сергей Димитриев.

Бәйгедә — Кукмара, Олыяз, Байлангар, Сәрдекбаш, Зур Сәрдек, Нырья, Ядегәр, Манзарас, Поч. Кучук, Түбән Үрәс, Янил, Зур Кукмара авыл җирлекләреннән көрәшчеләр көчләрен сынап карарга җыелган.
Көрәшчеләр арасында Түбән Үрәс авыл җирлеге башлыгы, карендәшебез Василий Сафаров та бар. Ул икенче урынны яулады.

“Василий Григорьевич чыгышы белән Үрәсбаш авылы егете. Кечкенәдән үк көрәш белән шөгыльләнә. Әтисе Григорий да, энесе Владислав та көрәшчеләр. Егетләребез хезмәттә дә, спортта да сынатмыйлар”, – диде авылдашлары Любовь Павлова.