Үтүкли беләсезме?

* * *

Йон киемне тискәре ягыннан һәм бары тик марля аша гына үтүкләргә ярый.

* * *

Чын ефәк тукымадан тегелгән киемне, дымлы килеш, артык кызу булмаган үтүк белән үтүкләргә кирәк. Ачык төстәге ефәк киемне – уң, ә караңгы төстәгесен сул ягыннан үтүклиләр.

* * *

Синтетик тукымадан тегелгән киемне үтүкләргә ярамый. Юганнан соң, аны яхшылап селкергә һәм махсус элгечтә киптерергә була.

* * *

Ирләр күлмәгенең иң элек – җиңнәрен, аннары – якасын (башта – сул, аннары – уң ягыннан), шуннан соң – арка өлешен, иң азактан алгы ягын үтүкләргә.

* * *

Костюм якасын башта – спиртлы (аракылы) суда чылатылган щетка
белән чистартырга, шуннан соң сул ягыннан берничә катлы дымлы чүпрәк куеп үтүкләргә кирәк.

* * *

Чалбар үтүкләгәндә, пычранган урынын уксуслы суда (1 стакан суга –1 аш кашыгы уксус) чылатылган киндер чүпрәк аша үтүклиләр.

* * *

Чалбардагы “стрелка”лар озак саклансын өчен, аны башта – уксуслы суда чылатылган марля аша, ә бераз кипкәч дымлы калын кәгазь аша үтүклиләр.