Тихвин чиркәвендә престол бәйрәмен һәм керәшенчә келәү итүне яңадан торгызуга 35 ел тулуны зурладылар

Бу көн, шулай ук, керәшеннәр өчен истәлекле дә. Керәшенчә келәүләр туктатылып, күп еллар узгач, яңадан 1989 елның 23 декабрендә Павел әтей Павлов тырышлыгы белән, Казандагы Тихвин храмында чиркәү-керәшен телендә беренче Литургия уза. Бу көннән соң инде 35 ел узды. Тихвин чиркәве - Татарстан керәшеннәренең төп иман йорты. 

Бүген туган телебездә уздырылган келәүгә республикабызның төрле районнарныннан керәшен священниклары килгән иде. Болар: Питрәч районының Керәшен Сәрдәсе авылын чиркәве настоятеле Димитрий әтей Сизов, Балык Бистәсе районы чиркәүләре священнигы Геннадий әтей Сизов, Алексеевск чиркәве настоятеле Павел әтей Чурашов һәм башкалар. Келәүне Тихвин чиркәве настоятеле Алексий әтей Колчерин җитәкләде. Келәүдән соң Алексий әтей үгет әйтте.

- Чиркәүләр ябылган заманнарда да халык Ходайга ышануын дәвам иткән. Шуның белән кеше күңеленә дәва һәм тынычлык алган. Бүген дә бик борчулы вакытларда да чиркәүләргә, келәүләргә килегез. Илебез тынычлыгы, хәрби егетләребез өчен теләк итегез, – дип үгет сөйләде Алексий Колчерин. 

Келәүдә Кукмарадан ук килгән карендәшләребез дә бар иде. 

Бик теләп килдек. Үз чиркәвебез булуы – зур сөенеч. Барлык карендәшләрне чиркәвебезнең торгызылуына 35 ел уңаеннан котлыйбыз, дип сөйләделәр кукмаралылар.

Прихожаннар теләк итте, җазык әйтеп, өлеш алды. Шулай ук, Тихвин чиркәвенең озак еллар настоятеле булган Павел Павловның кабере өстендә дә иман әйтелде.