“ТАТМЕДИА” 1нче класска баручы балаларга бүләкләр тапшырды

Бәйрәмдә «ТАТМЕДИА» республика агентлыгы җитәкчесе Айдар Сәлимгәрәев һәм «ТАТМЕДИА» акционерлык җәмгыяте генераль директоры Шамил Садыков та катнашты. Алар булачак 1нче класс укучыларына мәктәп кирәк-яраклары салынган рюкзаклар бүләк иттеләр. 

«Туганайлар» редакциясе хезмәткәре Энҗе Сабированың кызы Алия дә бүләкләнүчеләр исемлегендә. Ул да быел мәктәпкә бара.

Булачак укучыларны котларга «СалаваТik»лар төркеме дә килгән иде. Алар бергәләшеп җырладылар, биеделәр.

«Бәйрәм бик ошады. Балаларыбызны шулай матур итеп котлаганнары, әйткән теләкләре, бүләкләр өчен зур рәхмәт! Безнең өчен бу бик дулкынландыргыч мизгелләр. Беренче балабыз укырга керә. Һәр әти-әни кебек, без дә, Алиягә зур уңышлар, сәламәтлек, бәхет һәм киләчәктә үз юлын табарга телибез», — диде Энҗе Рависовна.