Татарстанда милли бәйрәмнәр көне билгеле

26 май көнне Лаеш районының Никольское авылында рус халкының «Каравон» бәйрәме уздырыла. Халыкны төрле мастер-класслар, осталар ярминкәсе, рус милли ризыклары көтә.

15 июньдә Мамадыш районының Олы Шыя авылында мариларның «Семык» бәйрәме була.

23 июньдә Казанда Сабантуй уздырыла. Бу милли бәйрәм 8-9 июньдә Татарстан авылларында һәм район үзәкләрендә оештырыла, ә 15 июньдә — Чаллы шәһәрендә.

29 июньдә Менделеевск районының Яңабирде авылында удмуртларның милли «Гырдон быдтон» бәйрәме үтә.

30 июньдә Тәтеш районының Килдеш авылында мордва халкының «Валда шинясь» бәйрәме көтелә.

5 июльдә Яшел Үзән шәһәрендә славяннарның «Иван Купала»сы була.

6 июльдә Әлки районының Сиктерме-Хузангаево авылында чувашларның «Уяв»ы үзенә чакыра.

13 июльдә, шимбә көнне, Мамадыш районының Җөри авылы янындагы болынлыкта «Питрау» керәшен культурасы фестивале оештырыла. Республикабыз һәм илебезнең төрле төбәкләреннән керәшен культурасын яратучы халыкны «Питрау» үзенә җыячак. Төштән соң башланып икенче көннең таңына кадәр Җөри болынлыгы танылган эстрада җырчылары, керәшеннәрнең фольклор коллективлары чыгышларыннан һәм спорт уеннарыннан гөр килеп торачак. Питрау бәйрәмендә кызлар арасындагы матурлык конкурсына нәтиҗә ясалып, «Кряшен чибяре» титулы иясе дә билгеле булачак.