Ташкирмәндә Краснодардан кунаклар булган

Краснодар туристларын Ташкирмән төп гомуми белем бирү мәктәбенең «Көмеш» балалар фольклор ансамбле каршы алган. Кунаклар «Көмеш»тәге кызлар һәм малайларның матур итеп керәшенчә җырлауларына сокланганнар. Милли киемнәре тарихы белән дә кызыксынганнар. Бу уңайдан, алар музейдагы экспонатларны да зур игътибар белән карап, өйрәнеп йөргәннәр.

«Ансамбльгә йөрүчеләр, Краснодар кунакларын  Ташкирмән авылы тарихы, керәшеннәрнең культурасы, сәнгате, һөнәрчелеге һәм көнкүреше белән таныштырдылар», – дип яза Ташкирмән мәктәбе.

Шунысын әйтергә кирәк, Ташкирмән авылы Лаеш районының «Бер юл – өч халык» дигән туристлык маршрутына да керә. Бирегә килгән туристларны, традиция буенча,  «Көмеш» балалар фольклор ансамбле каршы ала.