«Тәртип» радиосының баш редакторы «Туганайлар»ны яратып укый

Ризәлә ИСМӘГЫЙЛЕВА, «Тәртип» радиосының баш редакторы:

— Безнең «Тәртип» радиосы тапшыруларын Казанда (93,1 FM ешлыгында) һәм Чалллыда (90,2) тыңлыйлар. Шулай ук, интернеттагы кушымта буенча бөтен районнарда, чит илләрдә дә тыңлаучылар күп.

«Туганайлар» гәҗитенең табадан гына төшкән һәр яңа санын, беренчеләрдән булып күрәбез. Чөнки без ут күршеләр — редакцияләребез «Татмедиа» бинасындагы янәшә бүлмәләрдә урнашкан. «Туганайлар»га килгән кунаклар — бездә, безгә килгәннәре аларда дигәндәй, чын күршеләрчә тату, дус яшибез.

«Туганайлар» керәшенчә беренче марафон оештыргач, анда катнашкан барлык кунаклар да безнең «Тәртип» радиосында экскурсиядә булдылар. Студиябез белән дә таныштылар. Бер республикада, бер дәүләттә шулай күрше хакын хаклап, якын итеп, бергә кайнап яшибез.

«Тәртип»нең танылган шәхесләргә багышланган атналыклары бар. Керәшен җырчылары, язучылары һәм шагыйрьләреннән, мәсәлән, Гәрәй Рәхимгә (Григорий Родионов), җырчылар Георгий Ибушев һәм Лена Бичаринага багышлап, аерым атналыклар уздырдык. Радио тыңлаучыларны атна дәвамында аларның иҗаты белән якыннанрак таныштырдык. Тыңлаучыларны кызыксындырган сорауларны да җавапсыз калдырмадык. Әгәр дә бу олы шәхесләргә багышланган тапшыруларны кабат тыңлыйсыгыз килсә, телефоныгыз аша интернетка кереп, «Тәртип.татар» дип язуга, ул безнең сайтка тоташачак, ә анда бөтен тапшыруларның да архивы тупланып бара.

Киләчәктә дә бердәнбер керәшен гәҗите «Туганайлар»га рәхәтләнеп эшләү мөмкинлеге бирелсен. «Туганайлар» гомерле һәм язылучысы да, укучысы да күп булсын...