Сугыш чоры баласы – Евдокия Максимова

Евдокия Максимова 1932 елның 10 маенда Зәй районының Урта-Баграж авылында Фока белән Анна гаиләсендә туа. 1940 – 1944 елларда авылдагы дүртеллык мәктәпне тәмамлый. Сугыш вакыты алга таба укырга мөмкинлек бирми. Эшче көчләр җитми. Авылдагы эш кызлар, үсмерләр өстендә була. Шулай итеп, 12 яшьлек Евдокия дә әнисе белән колхозда төрле эшләргә йөри башлый. "Сугыштан соң авылда почта тараттым, телефонда утырдым", – дип искә ала Евдокия әби.

1954 елда Сарсаз-Баграж егете Григорий Максимовка тормышка чыга. 5 егет тәрбияләп үстерәләр. Кызганыч, бер малае бүгенге көндә вафат. Сарсаз-Баграж авылына килгәч басуда да эшли, күп еллар фермада сыер сава. Тормыш иптәше 1996 елда вафат була.

Балачагы, яшьлеге авыр вакытларга туры килсә дә бүгенге көне рәхәт, тынычлыкта уза. Евдокия әби ялгызы түгел. Балалары, оныклары, киленнәре әбине ялгыз калдырмыйлар. "Хөкүмәт безне онытмый, ил-көнебез тыныч, имин булсын",– дип изге теләкләрен тели 89 яшен тутыручы тыл ветераныбыз Евдокия Максимова.

Марина Халикова