Россия халкына патритотлык хас

Үзен, бернинди шиксез, чын патриот дип санаучылар соңгы елда 10 процентка артып, барлыгы 62 процент тәшкил иткән. Бөтенроссия халык фикерен өйрәнү үзәгенең март азагына булган нәтиҗәләре шуны күрсәтә. 

Бу үзәкнең сораштыру-тикшеренүләрендә катнашучылардан, патриотлык хисе ирләрнең — 93, ә хатын-кызларның 95 процентына хас икән. 18-24 яшьлекләрдән — 87, ә 60 һәм аннан өлкәнрәк яшьтәгеләрдән 94 проценты да үзләрендә патриотлык хисенең көчле булуын искәрткән.

«Үз Ватаныңны ярату» дигәндә, һәр ун кешедән сигезе үзенең моны ничек аңлавын әйткән. Аларның да җаваплары игътибарга лаек. Ватан дигәндә, кешеләр, беренче чиратта, үз гаиләсен, үз якыннарын һәм туып-үскән ягын, өен һәм аларның иминлеген, тормыш тынычлыгын күз уңында тота. Икенчедән, Ватанны ярату ул аны саклау, яклау, аның үсешенә үзеңнән лаеклы өлеш кертү, аның тарихын, культурасын белү һәм шунда яшәүне аңлата. Өченчедән, намуслы, гадел, тугрылыклы һәм Ватаныңа лаеклы булырга тиешсең.