Олы Атының «Башваткыч»лы киче

Тамашачыларны элекке керәшен авылы өен хәтерләтеп, Аты түтиләренең үзләре чиккән бистәрләр, чигүле алъяпкычлар белән бизәлгән сәхнә каршы алды.

Китапханә җитәкчесе Надежда Зоматаеваның элгәреге керәшен кызлары һәм хатыннарының милли киеменә кагылышлы сорауларына тамаша залындагы авылдашлары, берсен-берсе бүлдерә-бүлдерә, җавап эзләделәр. Араларыннан, бигрәк тә, Анастасия Шакирова һәм Татьяна Тузеева аерылып торды.

«Башваткыч»лы бәйрәм кичәсе Илья Архиреевның җырлары һәм «Ак түтиләр» керәшен фольклор ансмабленең чыгышы белән уралып барды. 

Керәшен культурасының аерылгысыз зур бер өлешен тәшкил иткән җыр-моң дөньясында ял итеп, борынгыдан безнең көннәргә кадәр сакланып калган олы мираска күңел белән орынып һәм күпләр әле үзләре өчен бик күп яңа ачышлар тәэсирендә таралыштылар «Башваткыч»лы кичәдән.