Керәшен авылларында Олы бәйрәм келәүләре үткәрелә

Быел ул 5 май көненә туры килде. Керәшен авылларында Олы көн келәүләре үткәрелде. 

7 май көнне Питрәч районының Янсуар  авылында Изге Покрау чиркәве каршында керәшенчә бәйрәм келәве узды.

«Аны Казан шәһәренең, Тихвин чиркәве настоятеле, протоиерей Алексий Колчерин һәм Керәшен Казысының Троица чиркәве настоятеле иерей Геннадий Сизов үткәрде. Олы бәйрәм атнасында  керәшен карендәшләр «Христос терелеп торган! Чынлап терелеп торган!», дип шатланып, сөенеп бер-берсен кочаклап котлау гадәте кергән.

Келәүдән соң, протоиерей Алексий Колчерин авыл халкына «Барыгызга да сәламәтлек, җан һәм күңел тынычлыгы телим!»– дип изге теләкләрен җиткерде.

Келәүгә кушылган, шөкер итеп яшәгән кешене Ходай үз ярдәменнән ташламас, авырлыкларны кичәр өчен көч һәм дәрт бирер. Келәүләр башка авылларда да дәвам итәчәк. Авыл халкы өчен олы сөенеч булды келәү үткәрелүе», — дип хәбәр итте Екатерина Яковлева.