Казанда «Казан Идел буе: халык мәдәнияте образлары» күргәзмәсе презентациясе булды

«Казан Кремле» музей-тыюлыгының Дәүләт учреждениесе бинасында яңа костюм комплекслары һәм аксессуарлар белән тулыландырылган «Казан Идел буе: халык мәдәнияте образлары» күргәзмәсе презентациясе булды.

Күргәзмәдә хәзер 44 костюм комплексы тәкъдим ителгән – ул XIX гасырның икенче яртысы – XX гасырның беренче яртысындагы рус, татар, керәшен, мари, мордва, чуваш, удмурт һәм башкорт киемнәре үрнәкләре. 

Казан Идел буе халыкларының кулдан тегелгән костюмнар экспозициясе һәм аларга каталог төбәкнең авылларына экспедицияләр йомгаклары буенча узган ел Казан шәһәре һәм Татарстан Республикасы көнендә беренче тапкыр тәкъдим ителде. Ул вакытта 29 киемне күрергә була иде. Хәзер алар тагын 15 традицион кием комплексы, шулай ук баш киемнәре, аяк киемнәре, бизәнү әйберләре белән тулыландырылган. Быел экспозициядә халык музыка кораллары һәм халыкларның көнкүреш әйберләре дә бар. Керәшен костюмнары арасында реконструкцияләнгән Менделеевск ягының керәшен киеме дә бар.

Мәртәбәле кунаклар өчен күргәзмә буенча экскурсиядә тарихи-этнографик проектның фәнни җитәкчесе Елена Гущина «Безгә хәзер элекке заманда крестьяннар ничектер төссез киенгән кебек тоела, ләкин бу алай түгел. Крестьяннар төрлечә йөргән, һәм шәһәр күлмәге дә рус, татар һәм башка халыкларның тышкы кыяфәтен үзгәртеп, акрынлап көнкүрешкә керә», - дип билгеләп узды.

Татарстан Республикасы Дәүләт Советы Рәисе урынбасары, Татарстан Республикасы Рәисе каршындагы Татар телен һәм республикада яшәүче халыкларның туган телен саклау һәм үстерү мәсьәләләре комиссиясе рәисе Марат Әхмәтов, яңартылган күргәзмәне ачып, традицияләрне саклауга, шул исәптән киемдә дә сак карарга кирәклеген ассызыклады. Марат Әхмәтов ТР мәдәният министры урынбасары Дамир Натфуллин проектны эшләгән белгечләр командасына рәхмәт белдерде, кайберләренә Рәхмәт хатлары, Мактау грамоталары тапшырдылар.

Әлеге чарада Я.Емельянов исемендәге мәдәни үзәк директоры Людмила Белоусова һәм әлеге үзәк белгечләре дә катнашты. 

Фото: Я.Емельянов исемендәге мәдәни үзәк, Халыклар Дуслыгы йорты