Карендәшләребез халыклар ассамблеясе конференциясендә катнашты

Конференциядә ассамблеянең 2021-2023 еллардагы эшчәнлегенә нәтиҗә ясалды, Уставка үзгәрешләр кертү һәм башка мөһим мәсьәләләр каралды. 

Конференциядә карендәшләребез — республика керәшен иҗтимагый оешмасының башкарма комитет җитәкчесе Людмила Белоусова, районнардан керәшен оешмалары җитәкчеләре Степан Спиридонов (Мамадыш районы), керәшен оешмасы җитәкчесе, Лидия Пронина (Питрәч), Тамара Баһаветдинова (Түбән Кама) һәм шулай ук, керәшен яшьләренең «Бәрәкәт» җитәкчесе Алексей Дмитриев та катнашты.

Делегатлар Татарстан дәүләт советы председателе Фәрит Мөхәммәтшинны, бертавыштан, ассамблея җитәкчесе итеп кабат сайладылар. 2007 елдан бирле Татарстан халыклар ассамблеясенә җитәкчелек итүче Фәрит Мөхәммәтшин үзенә шундый зур ышаныч күрсәткәннәре өчен рәхмәт белдерде. Ассамблеядә эшләүнең күп көч һәм вакыт таләп иткәнен, шул ук вакытта республика җитәкчелегенең моның мөһимлеген аңлавын искәртеп үтте.

Татарстан халыклар ассамблеясе башкарма комитетының яңа җитәкчесе итеп Ринат  Вәлиуллинны сайладылар.