Карендәшебез Елена Никифоровадан патисон маринадлау рецепты

Елена ел саен бакча тутырып җиләк-җимеш үстерә. Алардан кышкылыкка тәмле ризыклар да ясый. Шуларның берсе – маринадлдаган патисон.

Моның өчен безгә кирәк булачак: патиссон, укроп кәрзиннәре , хрен яфраклары, сарымсак, әче борыч, түгәрәк борыч (горошек), гвоздика, уксус, тоз, шикәр комы.

1,5 литры банкалар әзерлибез. Башта патиссонны һәм бөтен яшелчәләрне яхшылап юабыз. Патиссонны бәләкәй кисәкләргә бүләбез.

Стерильләштерелгән банкага хрен, укроп кәрзиннәрен, 2 тырнак сарымсак һәм бераз әче борыч салабыз. Туралган патиссоннарны банкаларга тутырабыз. Әзер банкаларга кайнар су салып, 15 минут тотабыз. Вакыт узгач, суны кәстрүлгә агызабыз. 

Банкага 1 аш калагы тоз, 2 аш калагы шикәр комы, түгәрәк борыч, гвоздика һәм тулы булмаган 1 аш калагы 70%лы уксус салабыз. Яңадан кайнар су салып, банкаларны ябып, одеял белән каплап куябыз.

Кышкылыкка тәмле маринадланган патиссоннар әзер.