Кабан-Бастырык чиркәве яңартыла

Питрауга туры китереп Кабан-Бастырыкта оештырылган Авыл җыенында, моннан ун ел элек төзелгән чиркәвебезне ремонтлау мәсьәләсе күтәрелгән һәм халыктан акча җыела башлаган иде. Авылдашлар озак тотмадылар, эшкә керештеләр. 

Тиз арада авыл чиркәве эче чистартылып, юылып, стеналары агартылды. Аны якты матур төскә буядылар. Яңа шәмдәлләр алып куйдылар. Чиркәү эче яктырып, зур шәһәрләрдәге храмнарныкы шикелле матур булып калды.

Матур дип әйтүе генә җиңел, биеккә менеп эшләр өчен маляр табуы, бигрәк тә эш сезоны булган җәйгелектә, җиңелләрдән түгел. Юлия Батаевага рәхмәт инде, биектә эшләүдән курыкмаучы малярлар табып алып кайткан. Малярларның буйлары түшәмгә җитә алсын өчен, Илья Батаев махсус басмалы баскычлар биреп торган.

Әгәр дә авылдашлар, якташлар бердәм булмаса, чиркәү эчен матурлап ремонтлап булмас иде. Кемнәрдер үз кул көче белән булышкан, кайсыларыдыр матди ярдәм күрсәткән.

Ә шулай да бу эштә башлап йөргән, буяучыларга булышкан Андрей дәдәй Кондратьев, Илья Батаев, Петр Батаев һәм Анастасия Кукина исемен аерып әйтеп үтсәм, башкалар үпкәләмәс. Алар Ходайның рәхмәтендә булсыннар.

Кабан-Бастырык авылының чиркәве хәзер тышкы ягыннан да, эчтән дә балкып, ерактан ук үзенә чакырып тора. 

Авылдашлар! Чиркәү ятим баладай ямансулап утырмасын. Келәүләрдә чиркәүгә юлны онытмагыз. Ходай юлында йөргән кешеләрнең гаиләсе имин була, балалары да бәхетле, тәрбияле булып үсә. 

Анастасия ШӘЙМӘРДАНОВА.
Лаеш районының Усад авылы.