Яңа Усы керәшеннәре зиратта өмә уздырды

 Авылда яшәүчеләр дә, читтәге авылдашалры һәм кунаклар да өмәдә теләп катнаша.

Кояшлы көзнең шимбә иртәсендә эш кораллары алган ир-атлар, тырма һәм сәнәк күтәргән хатын-кызлар авыл зиратына өмәгә җыелды. 
Зираттагы агачларның корыган ботакларын кисеп, чыбык-чабыкны читкә ташыдылар, чүп үләннәрен тырмаладылар. 

«Аллага шөкер, өмәдә бик зур күләмдә чистарту эшләре башкарылды. Чакыруыбызны тыңлап, өмәгә килгән барча кешегә рәхмәт. Халыкның бердәмлеген, авыл өчен тырышуын шушындый күмәк эшләр күрсәтә дә инде. Бигрәк тә, Владик Петров, Василий Пискунов, Анатолий Ермолаев, адашлар Геннадий Кондратьевлар, Михаил Ефимов, Юрий Кондратьев, Валериан Филиппов, Валерий Кондратьев үз көчләрен жәлләмичә тырышып эшләделәр. Бер генә өмәдән дә читтә калмаучы Рита апа Тазова, Люба апа Филиппова, Рәүфә апа Балтаева, Лариса апа Ефремова, Ольга апа Тазова һәм Зина апа Дарина бу юлы да килгәннәр иде. Роза апа Николаева, Альбина Романова, Гөлназ Шәмсетдиновага да рәхмәттән башка сүз юк, — дип өмәчеләрне тезелдереп санап китте Усы авыл җирлеге башлыгы Галина Романова. — Олег Игошев белән Геннадий Шадрин ел да үз тракторлары, печән чапкычлары белән зиратның территориясен чабып торалар. Барысының да үз изгелекләре үзләренә меңе белән әйләнеп кайтсын».