Ева Вагурова лицейга әбисеннән калган керәшен милли киеменнән килде

31нче лицейда уздырылган  «Милли киемнән йөрим»  акциясендә барлыгы 300ләп кеше – укучылар һәм педагоглар катнашты. Алар лицейда, көн дәвамында төрле халыкларның үз милли киемнәреннән йөрделәр. Арада татар, рус һәм башка халыкларның сәхнә һәм үзенчәлекләрен саклап заманчалаштырылган милли киемнәрдәге балалар һәм укытучылар бар иде. 

Ә иң матуры 8 «Б» классында укучы  Ева Вагурованың киеме иде. Ул үз әбисе кигән керәшен күлмәгеннән йөрде. Бу күлмәк аларның гаиләсендә олы мирас буларак, кадерләп сакланыла.

Бу акциядә җирле керәшен оешмасының идарә члены Алевтина  Даутова да катнашып, укучыларга элгәреге керәшен милли киеменең ни кадәр матурлыгын үзе кигән күлмәк, аның өстеннән япкан алъяпкыч, муенына таккан тамакса аша күрсәтте.