"Айбагыр”ның юбилей сменасында 70 бала ял итәчәк

13-28 августта Мамадыш районының Соколка авылы янындагы “Кама” балаларны сәламәтләндерү лагеры базасында “Айбагыр” этносменасы керәшен балаларын үзенә җыячак.

Быел – “Айбагыр”ның юбилей елы, ул унынчы мәртәбә кызларны һәм малайларны үзендә рәхәтләнеп күңел ачарга чакыра. Балалар биредә керәшен бәйрәмнәре, йолалары, җырулары белән танышачаклар. Алар өчен төрле конкурслар, кызыклы уеннар, ярышлар оештырылачак.

Кама елгасы ярының таулы матур урынында, нарат агачлары арасында урнашкан “Айбагыр” этнсоменасы координаторы Юлия Дувалова әйтүенчә, быел бу этносменага 70 бала җыелачак. Өч отрядка берләшкән балалар белән педагог-оештыручылар, вожатыйлар эшләячәк.

Балалар Казан шәһәреннән, Зәй, Тукай, Питрәч, Кукмара, Сарман, Мамадыш, Чистай, Алабуга, Биектау, Балык Бистәсе районнарыннан киләчәкләр.