Арина – коеп куйган рәссам

Талант — табигать бүләге, дигән сүзләрне ишеткәнегез бардыр. Мамадыш ягындагы Юкәче авылы керәшеннәре Светлана һәм Валерий Сазаевларның кызлары Аринага табигать рәсем төшерү сәләтен бүләк иткән. 

Арина бу яңа уку елында Шәдче урта мәктәбенең 10нчы классына бара. Рәсемне балачагыннан бирле ясый. Ул акварель дә куллана, бигрәк тә карандаш белән портретлар ясарга ярата. Аз сүзле Арина бөтен күңелен, хис-кичерешләрен рәсем итеп төшерә. Ул ясаган картиналар арасында «Керәшен кызы» портреты, Казандагы Алла Анасы иконасы да бар. 

Ул ясаган портретларны карагач, бу рәссам кызның кешенең төс-кыяфәтен ясаганда аның эчке дөньясын тоемлавына, кичерешләрен оста бирә алуына сокланасың.

— Рәсем ясау осталыгы нәселдән килә. Арина да үзлегенән өйрәнде. Аның махсус өйрәтүче остазы юк, — ди Шәдче мәктәбендә башлангыч класс балаларын укытучы әнисе Светлана. — Бер картинаны 3-4 көн ясый. Үзе әйтмешли, илhам ничек килә инде.