Албай авылында Бәрмәнчек бәйрәме алдыннан керәшенчә Литургия узган

Иртәгә Бөрмәчтеки – Вербное воскресенье.  Ә бүген Албай чиркәвендә керәшенчә Божественная литургия булды. Бертуган  священниклар Димитрий белән Геннадий Сизовлар уздырды аны.  Күрше-тирә авылларга да белдерү бирелгәнлектән, Дружба посёлогыннан, Владимирдан, Албай Казакларыннан да таныш йөзләр күренде.

Николай Ильминский, Василий Тимофеевлар инициативасы белән 1874 елда салынган тарихи чиркәү 2013 елгы куркыныч вакыйгалардан соң яңадан торгызылды, ләкин биредә келәүләр бик сирәк уза шул. Хәзерге авыллар өчен бүгенге службага килүчеләр саны, минемчә, аз түгел иде. Ләкин халыкның отец Димитрий белән отец Геннадийга бирәсе  сораулары күп: үзебезчә, керәшенчә сорау биреп, аңлаешлы җавап алуга җитәме соң?!

Чиркәүнең салкынлыгы Литургиягә килгән кешеләрне шактый туңдырды.  Җылы да булса, күбрәк аралашкан булыр иде службага килүчеләр үзебезнең священниклар белән. Авыл халкы аларны җәйге җылы көннәрдә көтеп калуларын җиткерде. Священниклар тагын килергә ышандырып китте.

ЛИДИЯ ПАСЫЕВА, 
Мамадыш,  Албай.

Автор фотолары. 

.