Клара апа әлифбасы

18 мартта яраткан шагыйрәбез, Тукай премиясе лауреаты Клара Булатовага 80 яшь тула! Шул уңайдан, каләмдәше Ринат Архипов балаларга аның иҗатына багышлап язылган "Әлифба" тәкъдим итә.

А

Апалар күп булса әйбәт,

Бәхетлерәк булабыз.

Бусы - Сарман якларыннан:

Анда туган, шунда үскән

Зур шагыйрә апабыз!

Ә

Әлмәтне яшьтән үз итте,

Иҗат юлы башланды -

"Ялкын", "Азат хатын",

Гәзитләрдә шигырьләре

Еш күренә башлады.

Б

Булатова Клара апаны

Укыйк әле берләшеп,

"Марс китабы" хакында

Алыйк әле серләшеп.

В

Вакытны әрәм итмичә,

Әйдәгез хәзер бергә

Китапларын укыйк инде -

Күңел тарта шигырьгә!

Г

Гамил абый аптырады,

Кабынмый машинасы.

Аны тракторга тагып

Авылны өч урап чыкты.

Тагын ничә урыйсы?!

Менә Марс кереп утырды,

Рулен болай-тегеләй борды.

Аннан...мотор терелде.

Ә абыйсы шатлыгыннан:

- Вәт егет син, Марс! - диде.

Д

"Диңгез суы нигә тозлы?

Су тозны кайдан алган?"

Күп китап укы - белерсең!

Беркайчан җавап биралмас

Сорауга надан калган.

Е

"Ерак мыни ул кибет,

Марс - бик уңган егет".

Шикәр аласы урынга,

Бер басасын биш атлап,

Сөенә-сөенә ул ни

Алып кайткан кочаклап?

Плюш аюны ошаткан,

Аны алып та кайткан!

Ё

Ё хәрефенә бар бер сүз,

Һәркемгә билгеле ул.

Елына бер куллансак та,

Хәреф белән таныш бул.

Ж

Жәлләп куйды Кыш бабайны

Кичә Марс: "Ул ара,

Капчыгы зур, шуңа күрә

Ул әкрен генә бара.

Утырмый машинага,

Булса да ап-ак Ага.

Аны бар дип тә белми -

Бензин, май исен сөйми.

Бүтән тәрбия алган-

Заманнан артта калган!

Җ

"Җир кояшсыз кала, - ди,-

Кояш янып бара!- ди.

Сүндер тизрәк, әти",- ди.

Марс әле кечкенә,

Аңа бары...өч кенә!

З

Зоопаркта бер маймыл

"Өйрәткән", ди, баласын.

Ни өченме?

Гел шул инде -

Тыңламаган анасын.

Өйрәтмиләр зерәгә,

Кайчагын маймылланганда

Марска да эләгә.

И

Ишегалды, бөтен урам

Яңгыр яуса чылана,

Җир чылангач, уйнаганда

Өс-кием дә пычрана.

Яңгыр яуганга бабай

Куана тик...Ник алай?

Й

Йәле, син әйтеп кара,

Буран буламы кара?

"Кара буран" котырганда

Урамга чыгып кара!

К

"Кызы да юк, эше дә күп

Әнинең берүзенә".

Бердәнбер мин. Булышырга

Кала инде...үземә.

Кер юышам, җыештырам,

Ипигә дә йөгерәм,

Кибеттән сөт тә апкайтам -

Барсына да өлгерәм!

Л

Ленарның бар энесе,

Илдарның бар сеңлесе.

Ни хәл инде итәсе -

Марсның юк иптәше...

Тик бер көнне таптылар,

Өйгә дә апкайттылар.

Курка икән тычканнан,

Иптәш мени ул аннан?

Әле дәү үсәсе бар,

Тычканны шулчак тотар!

М

Март башында табигатьтә

Үзгәрешләр юк, диләр...

Булмас сиңа! Шигырь укы,

Белерсең күп әйберләр.

Н

Нигә Айрат боеккан?

Зилә яңа җыр откан,

Яраннар чәчәк аткан,

Кибеткә кәнфит кайткан...

Моның сере билгеле:

Айрат алган..."икеле"!

Ң

"Әни! Казның бәрәне күп,

Сарыкныкы - бер генә!".

Бу Марс сүзләрендә

Кара "Ң" хәрефенә.

Сүзнең ахырында ул,

Уртада да очрый. Шул!

(Дәвамы бар.)