Шагыйрь Никифорның сары балкышлы, сагышлы хисләре

Көз шагыйрьләр иҗатында аерым урын алып тора. Алтындай көзләр... Сары сукмаклар... Сары офык... 

Югары Баграж егете Никифор Тукмачев Түбән Камада гомер кичерә. Бу танылган керәшен шагыйре тугызынчы дистәсенә аяк бассса да, хисләргә бай күңелендә шигырь уты дөрли. Аңа киләчәктә дә янып-ялкынланып иҗат итәргә, «Туганайлар» газетасын укучыларны яңадан-яңа шигырьләре белән сөендерергә язсын. 

Сары сукмаклардан атлап

Сары шәфәкъ, сары офык,
Саргылт кояш, сары ай...
Ничек көзләр сары төскә
Юмарт буладыр шулай.

Урамнарда — сары буран,
Юлымда — сары келәм.
Сары сукмаклардан атлап,
Гомер көземә керәм.

Кырыс җилләр каеннарның
Толымнарын сүтәләр.
Оялып, тартынып кына
Күлмәк сала юкәләр.

Кемне алкышлый усаклар, —
Торналар көтүенме?
Исән-имин, гомеремнең
Көзләре җитүенме?

Алина Кондратьева фотолары