Ирада Әюпова: “Бәрмәнчек” ансамбленең үз йорты булуы бик куанычлы”

"Бәрмәнчек" фольклор ансамбле үз биналы булды. Казан үзәгендә урнашкан бинаны төзекләндерүдән соң карарга дип килгән Татарстан Республикасы мәдәният министры Ирада Әюпова: "Ансамбль Республиканың брендына әверелде. Ул республикакүләм генә түгел, шулай ук башка регионнарда узучы чараларда да катнаша.   Ансамбль өчен чын күңелдән шатмын. Чөнки ансамбльнең үз юлында нинди авырлыклар белән очрашканын беләм. Аларга төрле вакытлыча биналарда эшләргә туры килде.  Ансамбльнең үз йорты барлыкка килүе бик куанычлы", - дип белдерде.

Бина төзекләндерелеп бетерелгәнче, ансамбль Халыклар дуслыгы йортында, Шәрык клубында, Курчак театры бинасында эшләгән иде. Спартаковская урамындагы бина ансамбльгә  2017 елда бирелгән  «Бер ел буенча капиталь  ремонт эшләре барды. 15 июльдә ансамбль тулысынча күченде. Элек, шартлар булмаганда, башта биючеләр, аннан вокалистлар, аннан оркестр, чиратлап репетицияләр ясый иде. Хәзер һәр төркемнең   үз бүлмәләре бар. Үзебезнең йортыбызда кечкенә «Бәрмәнчек»ләрне дә үстерергә, дигән планнарыбыз бар», - дип белдерде ансамбльнең директоры Артур Поляков.

Алексей Дмитриев фотолары.